Ka hringnun'ah hian !!

2

Posted by r_colny | Posted in | Posted on Saturday, July 30, 2011

Hringnun hi chunglam zahngahihna zarah kum tam ka lo dai chiau ve ta. Tuanna tlang leh mual pawh zungtang thliah theih zat ringot aia tam deuh te chu ka lo dai darin ka lo chil phul ve ta a. Ka hriatrengna kawngthuamah pawh hian zawh let tur tam tak pawh a insa thui ve hle mai. Ni e, kan hrerenga kan chhihchhiah a, kan vawng a mahse engkim hi a lo thuhmun reng thei bik lo. A inthlakin a in her lum renga, a then te chuan kumkhua atan min danglamsan ta mahse a tha zawk atan chuan a ni vek bik lemlo. Mualliam hnu te ngaiin kan kur a, liam lul lo se tia aw rawl tawp2 a auh lawm2 chang lah a awllo. Leilung tuah remin a her pui miau avangin zangkhua te pawh a bungbu fo reng a ni. Mahse a hnun lam chauh lang reng thei tur hian mai hi lum thei se tih chang a va tam thin si em. A thenin mual an liam a a then an la chambang bawk a, engkim mai hian hun ruat an nei theuh a, lan chhuah hun bik ropuina ni chu an chungah chuan tir theuh an ni. Hmangngaih kaltate leh thiantha mangtha tak zawng2te pawh ka dawn kir fo thin. Mahni chauh a laikhum han belh chang mawlh te hian nunhlui leh hun ngaih a zual thin. Thenkhatten piallei thuah riah hnuaiah riahrun an bel ta a then ten runlum nuthai changin mual an liam zo, thente pawh sialkhawpui mawiin hringnun tuah rem an la rel ve zel a. A ni he ka nun chhung reiloteah hian mitin mai chu ka hmangaih a, ka ngai a, an tan thah-khua ka lo pawtsei ve fo thin a ni.

There are places I'll remember
All my life though some have changed
Some forever not for better
Some have gone and some remain
All these places had their moments
With lovers and friends I still can recall
Some are dead and some are living
In my life I've loved them all

Nia, thian tam tak leh lairil biahthu 'D' hlanna tam tak te pawh lo neiin, he khawvel par hi lo mawipui ve viau thin toh mahila, tlaini tla turin kawlkil a chhun en diar2 kara 'sik boruakin lairil a tham er2 a, thlifim vawt ngaih maiin a biang a chem hik mek2 a, ral lehlam in pakhat atanga 'so this is christmas' tih hla a lo rik riai2 meuh chuan 'nang' lo chuan min hnem zoh loh sia ka hre chhuak thar leh uaih2 thin. In then tura intawnna khawvelah meuh hi chuan hmalam panin phei khai kan pen lo thei si lo a leh; inkalsan a tul fo thin. Mahse, chuti chung chuan he kalkawng thuam a ka phei a in khai chhung hi chuan engmah reng hian an tluk pha dawn si lo che a. Ni teh tak e 'nangin' min zam tawh meuh hi chuan ka ngaihtuahna thazam te hian mu leh mal reng nei lo hian a vakvai nghal ruai mai thin. Hmangaihna ka ngaihtuah apiang hian nangmah lo chu ka hringnun taksa hian belh tur dang a hrelo a ni.
Nia, thenrualte leh nangmah aia ram dai darh hmasa tute lakah chuan ka rilru awmnemna chuan mual a liam nghal mai bik dawn lo. An cham anga koh kira auh ruah2 chang te pawh ka nei awl lo dawn a ni tih ka pha lo. Tin an tana ka rilru puthmang te pawh ka thlak mai dawn lo, ka nuna thusawitute an nih tlat avangin hriahchhuah a koh let leh ruai2 hi ka bansan ngawt bawk hek lo ang. Ka hringnun harsa leh buai tak chawlhsanin ka hawi letin ka ngaihtuah fo ang, an rauthla poh ka zelh chang a tam ang. Nangma hmaa mi kal hmasa te hi theihnghilhni reng ka nei dawn lo ka hrereng fo dawn a ni. Chung zawng2 chuan min kapin min luahlum fo thin mahsela he ka hringnun khawvelah hi chuan nang ka hmangaih ber fo zel dawn che tih hi ka tiam nawn awn2 thung che a ni.!!!

But of all these friends and lovers
There is no one compares with you
And these memories lose their meaning
When I think of love as something new
Though I know I'll never lose affection
For people and things that went before
I know I'll often stop and think about them
In my life I love you more

Ka hmangaih hmangaih kaltate koh kira hnuchhawn ram ka thlir chang pawn, a ni ka phei khai lai chawl a chawlhhmun ka belh ni te pawh lo thleng thin mahse hei hi lo hre reng ang che - heng zawng2 te ai hian 'ka hmangaih ber fo a che'...

'In my life I love you more'



Read more >>

Ka Mobile Lens Khawvel !!! part - 3 (Solomon's Temple, Chawlhhmun)

4

Posted by r_colny | Posted in , , , , , , , , | Posted on Wednesday, July 13, 2011

 MZU a kal remchan chu remchangah lain Kohhran Thianghlim ho biakin pui ber Solomon's Temple an tih huai2 Chawlhhmun a mi chu kan tlawh haw ve a. A sakna lamah an tangin an thawk ho tha bawk a, ralkhat atanga thlir ngawt ai chuan a hmunah chuan a lo ropui ngei mai. Kum 1996 khan a Biakin lungphum an phun a kum 20 chhung sak tura ruahman niin tum anga a kal theih chuan kum 2016 ah chuan an hawng thei toh dawn a ni.La zo chiah lo mahse a pianhmang leh a hmel hmang tur chu (pawn lam) a hriat vek tawh tho a, an sak zawh meuh chuan chhuantham khawpa mawi leh belh chian tlak a ni dawn tih chu in hnial kher ngai loin a hmuh mai theih a ni. A chhung lam erawh thawh tur a la tam tham deuh a sawi belh tur bulfak tak chu a la awm lo.



Hei hi Biakin chhunga kan luh tirhah kawngkhar veilam sirah an lo hung a, hmun danga hun tur mahse la remchang mai lo a nih duh hmel hle a ni. An emblem emaw ni turah ka ngai a, an chawkidar kha ka zawt hman ta lo a, Philadelphia tih in ziak khian engnge a entir tih pawh ka hre thei ta hrih lo a ni.



He Temple hi compound hung nei chhunga awm a ni a, kan kal hun hi Ningani a nia an gate pui hi an hawng lo a, Sunday inkhawm velah chuan an hawng ngei turah chuan ka ngai a. A sir ding lam leh vei lamah hian mihring kalna chi gate an siam ve2 a hei erawh hi chu an hawng reng a ni. A veilama mi zawk khi chuan kal tlang a hlawh vak lo a niang gate bul velah pawh hnim hringin a zam hnan chiai2 reng a ni.



Gate chhung kan lut ta a a chhunga pillar 4 awm tur zinga mi pahnih chu hmuh nghal maitheiin a lo lang ruau mai a, Mizoram a biakin dang nen chuan a sakhmang leh pianphung a inperhsan hle tih a lang nghal mai a. A sir lama pillar thenkhat la rem zoh loh chuan tlemin a hmel mawina a la la kiang deuh tho rualin tunah mai pawh hian a langsar nghal nalh2 viau tho a ni.



Biakin hulhliap kan thlen chuan kan dinglamah a Temple statistics an lo hung a, kimchang takin a sakruang leh zia rang an lo tarlang a Temple han thlir vel leh han belh chian pawh a ti interesting hle a ni.

 


Temple luh phei dawn chuan a tlema lo chhawrdawh chhuak deuh hlek hulhliap anga ruahman a awm a chumi chungah chuan vantirkoh pahnih hian tawtawrawt vanlam hawiin an ham lai an dah a, han hmuh thut chuan Vatican lama biakin ziarang te pawh rilruin a fang nghal rum2 thei a ni.


                                   


 Temple luh hma veilam pangah pawh vantirhkoh chuan Temple hmaa arsi 7 intlar that awmna lam chu hawiin chawimawina tawtawrawt chu a ham a.



  

Temple hmalam dinglam sir kil

Temple hi kal hel chhuah pup theihin an sa a chuan a kil tinah hian luhna tur a awm theuh bawk a, hulhliap angreng a lawr chhuak bikin kawngkhar zawn chu a hliahkhuh vek bawk a ni.

                        

Temple kawngkharah hian darthlalang hman a ni a, chhunglam hi pawn atang pawn chiang takin engtik lai pawn a lang reng thei a ni.
Tumah thliar bik leh thlei bik a awmlo tih entir nan a chhungah hian puanzar hran leh dawhsan bik reng2 a awmlo a chumi piah a ban pakhatmah a awm lo bawk a ni. A chhung hi sawi tawh angin an la zoh loh em avangin engti takin nge a hmelhmang hi a awm dawn a la hriat thiam theih chiah loh a ni.



A inkhawm hruaitu awmna lam chu a hriat theihnan a hnungah an mahni chhinchhiahna chuang puanin an zar a ni.



 A tir a sawi tawh ang khan a hmalamah chuan vantirhkoh pahnihin tawtawrawtin Davida Arsi 7 te chu chibai an buk a ni.



 Tichuan kan fanchhuah vel hnu chuan Temple chu kan chhuhsanin kan hawsan dawn ta a, a tawp nan a hma kawtzawl atangin a hma tak atanga a lan tak chu ka han la leh hram a ni.
Read more >>

'Hmangaihna' - Vankhama

18

Posted by r_colny | Posted in , , , , , , , , , , , | Posted on Wednesday, April 13, 2011

Mizoram Competitive exam te han tum ve rilruk deuh ik leh optional pakhata Mizo paper lak tum bawk si chuan hla chi hrang2 hi Syllabus a mi nih miau vangin chhiar kual ve duah hi a ngai a. Tuipui vak lemloh thilah te pawh hian rilru leh mit hi fuk luih tir a ngai viau mai. He hla 'Hmangaihna' tih Vankhama phuah pawh hi ka lo la bih chiang em2 ngai lemlo a mahse han chhiar han chhiar ve takah chuan ngaihtuahna te pawh a pawtseiin mahni a han kawm ve melh2 pawh a lo awl ve riau mai. Johnson College a coaching Mizo paper bikah an lo pek hlauh chu remchanga lain a theih ang2'in kan mawng te kan han hung ve a, lecturer ho sawi eng atang pawn ngaihtuahna peng hrang2 ah kan in pawh darhna he hla bik te pawh hi a lo hlimpuiawmin a lo tuipui awm hle a lo ni.

Hmangaihna kan thlir dan hi a hrang theuh a a thlen chin pawh 'thlirtu','dawngtu' leh 'petu te' thlirna tlang atang chuan a entlang pawh a dang vek hlawm awm e. Hmangaihna dik sawifiah leh hrilhfiah a har tluk zetin, hmangaihna suak chu hmuh thiam a har ve bawk. A thenin 'duhtakte nen a bahra laih' an thlan laiin a then chuan duh vak lemlo te nen a sa leh buh changrum kil ho an thlang zawk ve fo. Vanneihtluanga ten hmangaihna kil tin atanga an thlirna mit hawh pui ngat phei chuan a engpawh ni se, engvang pawhin emaw engtiang pawhin emaw hmangaihna chu lo piangin lo par vul mahse a diklo leh han sawi leh sel na tur bik a awm nem maw!!tih hi thil awl tak a ni. A duhtu chuan a duhna chhan lai tak kha hmangaihnaah a chhiar dawn miau avangin. Sum leh pai avangte,sakhmel leh fuke avangte, nungchang avangte leh a dang za tam avangte a kan duhna a luanliam miau chuan chhan nei leh behchhan nei theuh an nih vangin an thiamawmlohna leh a hlutna a nep phah tih sak ngawt chu a har fo thin. Mahse chung kan sawi zozaite avanga kan duh leh hmangih ngawih2 tena lengdang min chhaisan a nih si chuan a den zawng a nat kher awm e. Chem lo'a in vih nat dan ber a ni mai lawng maw?...

'Thuhriltu'n hmangaih thu hmana a hril chuan,
Hmangaihna bak lei chhinah ropui awm lo,
Inhmangaih theuh ru, ka lenrual duh te u,
Hmangaihin infak, uanthuan reng a rel lo,
Hlemhlet leh itsik,dawt thu a mau sam e,
Kei ka thu leh hla ngei kha a lo ni e.'

Vankham'n 'Hmangnaihna' a tuipui dan hian ngaihtuahna hrang2 a siam hnem ve hle awm e. He hla chang hnih leh a thunawm awmah hian 'hmangaihna' ri ruat dan leh a duhthusam chiang takin min thai lan sak a,mawi tak maiin hmangaihna dik awmdan niaa a rin chu hmuh theih turin min pho chhuahsak a ni. A chang hmasa ber han chhiar hian 'engti zawngin nge min kalpui ang aw' tih vawng2 a awl hle mai a. Khoi huam chhunga dah tur chi nge ni ang, pathian hla rim a nam deuh em aw emaw lengzem hla lam a pawl nghal mai a lawm le tia inhnialna awka chhuah mai theih te pawh a awl rum2 mai. Tirhkoh Paul'a hmangaihna thurin kha a lo fah chhuak ni bera rin a pawm tlang a ni a. Chu Paula'n hmangaihna khawvel a a ropui ber zia a seh chilh chu lo tuihnihin chumi eng atang chuan hmangaihna thlazar ropuina leh duhawmna hulhlip hnuaiah chuan min khawm lut a - itsikna, infak, uanthuan dawt thu reng awmlo hmangaihna chu mitin tan a awt em2 a, inhmangaih theuh tur pawh a min duhsak pui sia a sam chiam a, chumi ti nghet tur chuan amah ngei pawh lo in kai lutin a 'thu leh hla ngei' a nih zia a ti lang chhuak a ni.

Hemi chang han thlir ringot hi chuan Vankhama tum ram hriat thiam a har hle mai. Tlang sawn theih hial rinna neiha hmangaihna neilo dar ri mai2 ang ruamah khan min hruai luh tumin ti khan a chham kual ta mai a mawn le aw tih te pawh a awl hle. Thuhriltu thu leh hla a bul tanin 'Ama' hmangaihna ropuizia puan chhuah a tum a mawn le tiin rilru pawn Bible chang dang a zawng nghal ruai thei awm e. Mahse a thunawn han sak thlen meuh chuan a awki a dang leh daih mai si a.

I sakhmel tawn changin thinlai a eng a,
I sakhming an sel leh kawl ang ka hnim a,
A tha par tin kha bawihte, i tan ka ti,
Theih chang se, i tan si ar lak ka huam e,
Ka thai chang mah lo la, khiangawi mi tawnah,
Hmangaih, lung i dum phawt chuan lawm zel ta'ng e.

-hmmmm post khat atan chuan a sei uchuak dawn tlat a dang'ah chhunzawm leh mai zawk teh ang...







Read more >>

Ka Mobile Lens Khawvel !!! part - 2(Biakin-1)

0

Posted by r_colny | Posted in , , , , , , , , , , , , | Posted on Monday, March 21, 2011

Inkhawm lam hi tam em2 lo mahila remchang te a nih hi chuan Biakin thlalak hi nuam ka tiin ka lo hmeh ve leh nual mai thin a. Han kal tlang nikhua te hian mobile phone tangin awlsam tak2 a hmeh zung2 a lo awl bawk nen nikhat a ral meuh hi chuan a lo awm khawm ve leh ruih mai zel a. Hei a bultan nan pali kan theh chhuak ve leh mai2 a nge. Engmah lo ai chuan tlemte pawn nghawng a neih kha maw...





Khatla South Church


Zarkawt Church


Mission Vengthlang Church


Chandmari West Church
Read more >>

Ka Mobile Lens Khawvel !!! part - 1(Hyderabad)

0

Posted by r_colny | Posted in , , , , , , , , , , , , , , , , , , , | Posted on Saturday, March 12, 2011

Update lohna a rei ta,ka space khawvel te reuh te poh a hmuar hman ve lek2 ta mai. Rilru lamin thil dang a ngaihtuah miau chian thu leh hle khawvel poh chak loh sa nak laiin a ro mai niloin a kang chat hneh hle thin mai. Tui luang kianga thingphun a hnah hring dup reng mai anga zung kaih hluah2 te pawh a chakawm thin hle a ni. Mahse hmasawn zel tur ta fam chuan hawisan then neih leh thlauh then neih a ngai zel mai si a. Kum 2011 atana a voikhat nan ka phone hlui tuaihnum thar Motorola E6 ROKR hmanga thla ka lak te hmang hian helai hmun hi i han hnawh khat leh phot ang hmiang. A part hrang2 ah thliarin theme nei deuh hlekin a tah tawla tih chhoh tumin phei kan khai ve a nge. A hmasaber atan Hyderabad awm chhung reilote a ka lak kual te ho hian i han tuai hnum ang hmiang le.

Tin kan thlok chhuak dawn ta a, pawn lama eng riai2 kara Indigo thlohna lo bawk phek thlur mai chu a hmuh a nuam ve tho mai

Airport ah a tihtur neih vak loh chuan an trolley nawr mai2 pawn mit a la viau zel

Kut them thiam thil chi hrang2 an zawrhna hmun a mi- Shilparamam

Hyderabad Outer Ring Road sir a tuikhuah awm a nitla tur in zam pharh chu a lang mawi ve hle mai

Tlailam - Gopanpalli lamtluang

HITEX Gate - Hyderabad

Chu tlairam khawhar takah chuan French Twin Lamp te poh chuan eng an chhuah dawn ve tran riau2 a

Shilparamam a kutthem thiam thil tam tak an pholan thin chuan mit a la thin hle reng a ni

WIPRO Building - Pride of Hitex City, Hyderabad
Read more >>

Christmas Chibai ...

1

Posted by r_colny | Posted in | Posted on Thursday, December 23, 2010

Kum tam a liam leh meuh chuan hunpui massi pawh pathian hruaina zarah hei ka ban phak chu ani ve leh ta reng mai a. Thlasik ni eng mawi in zam vel kara lalpiang lawmna hla han ri leh chuai2 thin te pawh hian dam hlut zia a egti zawng maw tal chuan mitin tan a puang ngeiin a rinawm. Keini reiek tlanga ni tla hmuphak a awm tan meuh phei chuan kawlkil rawng in kap ki eng chu a hmuhnawm lehzualin, mit a tlai zualin pathian thil siam hi a nih tur angin a in puang chhuak chiang lehzual hian a hriat thin.

Kristmas bazar chakkhai la khawm a han chhuah vah changa tawt tak maia mi in sul pel zung2 mai leh kohhran tin maiin biakin leh a vel an cheimawi thar leh sup2 takah chuan hunpui inthlak pawh chu inhrilh chawp ngai loin rilru ah a chiang thar em2 a..Kawngkai dar nghak tam takin 'sale sale sale' an tih lauh2 te chu rimawi a nihna chen te pawh a awm ve fo mai.

Hmel leh pianphung,nunphung,serh leh sang in anglo tak2 mai min hnup khawm a hlim hmel in hmuh chunga kan han in nek khawm talh2 te pawh chuan chu hunpui ropui na chu a hril kan ti lo thei lo ang. Hmangngaihna zam vel thlasik thli vin tak maiin a a len darh chem2 dawng fuh tu tan te phei chuan a hlu lehzual em2 ta ve ang. Hmangaihna vanga he hun hmang thei hi kan nih avang ngeiin a hmangaihna chang fuh tu tan chuan a kalhkimna ti ila kan ti sual ltk lem lo thei ang chu.

Engpawh chu lo ni ta se, he hun hi hlimpui tum threuh ila kumkhat a kan nghah chhung a rei thin zia te rilru a hre reng chungin kan hlimna hian lungngaihna min thlen lul lo teh se...'kan vannei em e lawmna ni kan thleng leh ta...' tiin lam i thai teh ang u.... 'give love on christmas day'...

Kristmas chibai vek ule...
Read more >>

Kelsih Tlangdung !!!

2

Posted by r_colny | Posted in , , , , , , , , , , | Posted on Monday, October 18, 2010

Hmanni kan veng KTP sports chu Kelsih tlangdung lamah kan va nghat teh daih a, saw lam thlen phei lohna a rei deuh tawh bawk nen rinai takin a ram hmel hmang chu mitah a thar angreng phian a. A ram thleng a nuamin a zawl thra bawk a,a chuan pawh a nuam hle mai. Infiamna lam tih thiam em2 nei ve ta lo chu thla te kan la kual vel mai2 a hei tlem chu post ti tam tu atan kan han vawm bei ve leh mai2 a nge...



Hei hi eng kohhran biakin chiah nge ka hre ta lo a, a kalkawng leh a hmun in nghahna vel khian lung a ti leng duh hle reuh mai..


Kelsih khelmual-ah kan naute ho pawh theih pa tawpa ball petin an tal na ve hle, kal hun hi a fuh chiah lo a,a diakin a bumro hle mahse a boruak nawmna leh a hlimawmna chu a tih nep phah chuang lem hlei law.

Tlailam a ni a khua pawh a hnim tran ve ria2 tawh a, kan infiammi te pawn duhtawk ngah trepin siang kan lawina lam bel turin kan phei pawn kan sawn ve trep tawh a. Chumi hun kar tlemte la awmah chuan vanzawl pawn a ropuina leh mawina chuangin a lo in phar darh ve mek bawk a, Pathian thilsiam ropui tak chuan an zia an chhuah ve mek hlawm a ni.
Read more >>