rilru vakvel

Posted by r_colny | Posted in | Posted on Monday, May 26, 2008

Voiin chu, han ti teh dawt mai ila, kan hna lampang kan chawlh ni a ni ve teh khiah nen hman a awl kher mai. Mahse hman tih avang chuan engdang mah ka tih phah chuang lem hlei law, inah hun ka hmang liam tam deuh a ni mai a nidang nen a danglam em2 hran hlei law. Rilru hi a mak khop mai a, thil ropui dang eng teh vak mah han chai chhuak lem lo mahila chhungrilah hian chawlh tih hriat na hian nuam veng2 hi a keng tel reuh a, a hlimom na a nem chuang miah lo nia.

Khawvel kalphung hrim2 hi hriat chian a har duh ngei mai. Nikum thianpa valpuian min boralsan lai vel khan ngaihtuahna a vak thui duh khop mai a. Eng tikah nge he kohna hian min auh ang a, chhan loh theih loh hming lamna ni chu lo thleng ang tih mawlh mai khan min tuam a. Mahse hun a liam a a ngaite bawkin kan hmang ral leh mai a. Nimin khan hyderabadmizo.org kha thla tam hnuah ka han enkual leh mai2 a, ka thil hmuh hmasak ber chuan thin a thawng kher mai. Dika, kan awm tirh a ka hriat hmasak ve ber pawl thlalak ( a nui sang lai) a lo lang kiau mai a, mahse a thu ken erawh chu nuih zui pui chi a ni miah lo. Mi a thawngin 'mak' tihna chuan min fan nghal a, hun liam tawh min chhui tir a, thil dang ngaihtuah thei miah loin rei tak min phuar ta mai a.

Ti hian ka ngaihtuah chhunzawm ta a. 'Thihna' kan tih hi a mah hrim2 in min zam velna ni lo hian a kut vawtin a khawih a te zir hian kan nunah thu a sawi zawk a ni awm mang e aw ka ti ta rauh2 mai a. Nitin mihring sang tam takin chatuan ram an pan, mahse second khat pawh ngaihtuah zui nan kan hmang lem lo. Chutihlaiin kan chhungte , thenrualten an tawn ve meuh erawh zawngin thil dang reng tih zai a rel theih si loh a.

He lei hi 'the have' leh 'have not' inkarah a che tla a, neitu nih loh chuan nun hi a chau ngawih2 mai a lo ni ber e. An phu , an thawkrim a a awm e kan ti a nih pawhin - kei ve hi chuan a fair hi ka ti thei mawlh lo. Ka ngahtuah nasat zawh poh leh a mak ka tihna hi a zual telh2 thin. A phu a te ka sawi a ni lo, a nei lote neihna hun remchang nei miah lo a khawvel hipa boral ta te hi a ni ngaihtuahna kengtute chu. Kan lehkahbu thianghlimah hian a sawi tum tak hriatthiam chak em2 mai ka nei ve reng thin. Chang pakhat ah chuan ' a nei pek belhchhah an nih tur thu leh a nei lo te laksak' an nih tur thu a sawi a, a ni kei hian he thil hi a awmzia ka hrethiam loin eng ber nge a tum tih hi kan lal Isua hi hmaichhan a zawh ak chak ve reng thin.

Lengzem thar a article pakhat chu pipute nun, hlothlo nun chungchang ziahna a awm a, a ngaihnawm tawpin ka hre ve a. Khang hunlai kha hmuin he nun hian tawng pha ve chiah lo mahse, ngaihtuahna khawvelin min lenpui lai chuan kawtchhuah a nula tlangval inlawmtur in nghakkhawm haw2 ri te pawh min hriat tir ve vuai2 thei a, favang awllen laia nula tlangval rilru thawveng taka inrim thawm te pawn bengrawng an awi ve riai ruai a ni. Aw, chu naupang ho pawh perhpawng vaiin ek tharlam zawng in an vah leh tak suau2 saw. Lung ti leng tu hi thil changkang leh tharlam ber2 te ni loin khuarel min hmaihtir a, thobul min hruai kir leh thei tute hi an ni fo mai.

A tawp berah chuan - thianpa Dika mangtha le !! He hrinmi ram ah hi chuan tawn leh ni awm tawh dawn lo mahse, kan beisei 'lal lenna tual nuamah' chuan kan lalpa fakin kan tlai tluan leh za ka beisei. Adieu !!..

Comments (0)

Post a Comment