chhungril khawvel

Zanin ka office bang haw chu kei leh kei lo ang deuhin ka harh angreng phian a, car kawngkhar a dak chhuak voh2 pahin ka rilru ka han len kual vel mai2 a, eng mah thupui run lam han ngaihtuah chu a har angreng phian. Hmuh than fo mah niseng kawng kam a thil tar vel te pawh chu ka melh let ang hu2 kawng tluan ta deuh mai a. Mahse chutia ka mit hleiin thila a melh kual vel mai2 karah chuan ka rilru hi 'vanneihna' tih hian a luah ta tlat mai a. Thil tam tak chu ka ngaihtuah chhunzawm ta teuh ang lawi a.

Kan hma lawkah hian car pahnih an in su thuak mai a, vai mizia tih takah an rak nasa kawhop mai , engmah tak2 chu an sawi chhuah chu ka ring lem hlei law. Kan tlanpelh lai chuan ka han hawi let thuak a, ti hian rilru ka han kaipharh zui ta mai2 a. Kan awmna hmunah te hian nitin hian accident avang hian mitam takin nunna an chan reng a, kan kawng zawh lai te ngei ah pawh chuan thlarau tam takin an lei taksa an lo chhuahsan fo tawh thin a, mahse hei keini chu engmah harsatna leh buaina awm miah loin kum hnih chhung kan lo tlan tlang ve chu a lo ni reng a. Kawng sira hna thawk haw tur hruai cab lo sawi bawi mai han hmuh changte hian kan chhuanna a ni ve thei tih hi rilruah a riak reng thin, mahse tun thlengin harsatna awm loin in ka tlengin hna ka thawk thin si a. Aw, mi vannei ka va ni em !!

Traffic a jam a, motor kan ding hnuk mai. Chutah, kawngsir atangin mihring an lo tho tuam2 a motor bang leh a bul velah an vei suau2 mai a, eng an ti nge in zawh a ngai lo - kut dawh in leh lo nei lo a, lu nghahna nei lo kawng kam vel luah lum tute an ni. Mihring chu kan ni vek, rilru neiin kan taksa pianhmang pawh a danglam chuang lo, an tahin an biangah mittui a luang ve thin. Hlimna an tawnin an nui hmel a hmuhnawm loh bik chuang loh, inang khata min siam tu chuan duat taka a din vek kan ni. Boruak mamawhin nitin an hnar an len ve reng a, riltamin eitur mamawh ve reng an ni. Hmangaihna chuan a kalsan mai bik lo a, mipa leh hmeichhe inkar rilru induhna piang thin pawh an tawng lo bik chuang lo, chumi luangliam chu tlanin fanau maltluan chawi turin din an ni ve tho. Naupang te pawh sawi loin thil zuarin engmah tih hreh reng a awm lo - kut an dawh , thil an zuar, motor an hru - mitin reng en dawng an ni. Mahse a tawpah chuan 'mihring' vek kan ni. Dinhmun a inang lo mai pawh a. Chutiang karah chuan naupang pahnih chu hlim em2 maiin an lo in um kawi vawr2 a, an hlimna chu laksak theih a ni lo. Engmah an hrethiam lo, khawvel rual awhna chuan an nunah thu a la sawi lo, motor chhunga mi hausa pui2 chu an awt bik lo an kiangah chuan kawr hak tur mumal pawh nei loin tal mahse an zavai chuan chu nun 'hlimna' chu a ni an zawn vek ni. Mahse khua a tlai a zan a rei meuh chuan an riahrun chu kawngkam phul zingah chuan a ni leh mai si a. An chan ka han dawn chuan tuna ka awm dan a ka awm thei hi changsang ka in ti a - 'mi vannei ka va ni em ' ka ti vawng2 mai a.

Mahse ka han ngaihtuah chiang telh2 hian - ' mi vannei ka va ni em ' ka tih fo na chhan hi mi dang vanduaina vang a lo ni fo mai a, chu ngaihtuahna chu midang chanvo atanga ka chhut a nih si chuan rilru dik a ni thei dawn a mi ? Midang harsatna tawh chu khawngaih a hnekin vanneihna ah ka chhiar chuan kan rinna midang tan a malsawmna nen khan a va in perhsan awm si em !!
Ka rilru a kal thui telh2 a ka buai ta telh2 mai - eng chu nge ka nih tak ber ? aw chhan a va har si em !!

Mahse hei hi zawng ka chiang ' tih boral a ka awm lo hi lalpa zahngaihna a lo ni ' tih hi.
Kan chana lawmna hi a lo ni ber awm e lawmna leh vanneihna famkim chu. Kan bul a mi te kan en a ngai lo. Kan neih kha kan lawmpui a kan chantawk kha khuarel malsawmna a kan pawm thiam hi. Mahse he hringmi nun chan kan zir chhung hi chuan thil har ber pawl a ni reng dawn si a.