chhungril khawvel

ram ropui tak chu zawngin, hling leh hriam tam tak ka lo paltlang ta. ka hma eng te tak te chu a len telh2 beisei na nen ka pan tawk2 a, mahse ka hnaih zawh poh leh a te emaw tih mai turin a thim si. chu ram nuam leh chawlhna tuikam ah chuan ka hah ka sawr fu thei anga, ka thlan te chu a tuifim hmang chuan phih faiin, chu boruak thiang tak chuan ka thinlung ngui te chu ka chhem nung thar leh dawn a ni. beiseina hian nun hi ko kal thin mahse, beiseina beidawng a thlen meuh chuan nun awmzia hriahthiam a har duh ngei mai, a nat em avanga he hringnun hmachhawn ngam lo a mahni taksa ngei pawh fam chantir kan kat nuk reng a ni.
chu huan a par rim te chuan ka hnar na tawng vai2 a, a hmun mawina te chu ka hmu pha vuai2 bawk a, mahse a par kung dawn meuh a a rim hip lut tur leh mit note mawi khop a thlir tur chuan ka hma kawng chu a la inphar thui hle si.
ka phur chu rit tih chang a tam thin, ka zo lo tih paha keuh thlak rawp mai pawh rilru chuan a tum ut2 mai thin. mahse ka phal mai si lo, chu ram lo pawh chu a tam a lawm tihin in hnem ka tum fo a, kawng pheng thler sung zinga pakhat ve mai a nih zia chu ka hre meuh mai. ka pen lohna aia a nawm zualna bik sawi dawn ila ka thiam lo, beiseina'n a ni ka pan ni; ka thinlung kawng chu ka zui a, ka kal ka kal mai a ni.
famkim lohna khawvel a nih chhung chuan kan famkim si lo, tlinlohna ramah hian kan tling lo vek a, kei ngei pawh; midang pawh. ka puak phur chu nghatin kawngkam tui chu dawt chang ka ngah mai, mahse ka kalsan hlen thei si lo. min phuar tawh a, min tawn bet tawh a, ka tan phelh theih a ni tawh lo. phelh tumin awmzia a nei hek lo. ka kalsan hlat poh leh a hrual a pawt zim a, a valh a na ting mai a ni. mahse, mahse zan thal eng hnuai a mahni chauh a khua ka chuan chang chuan zalenna nun chu ka thlahlel fo thin si.
chu kawng chu a thim ta a, eng te reuh te pawh chu a alh zo ta lo, a mut ringot ta a ni. mahse kum kha chen ka beiseina nun kha ka paihthla mai dawn em ni ang, nge chu a vam tlem te eng de zeuh2 chu thingtang vur belhin ka chhem alh thar leh dawn ?.
duhthlan thiam hi a har a, chu ai mah a har zawng chu duhthang tur dinhmun a din a duh loh zawk thlan ngai ta si hi a ni.

A melh zet chuan hringnun a kuaiher chiang hle mai. A mitmeng pawl ria mai leh a mitmu dum tak ngak mai , a ko tlang bawr tawk chauh a mitbu chhah , siamtu siam dan bak chuan a khawih danglam lo tih hriat taka pawr deuh luih bawk si , a mit sir lama zum chho deuh, a zim han tih dawn lahin a meng kal mai bawk si a, han en thuak a mit la en chian zoh pawh leh hmuhnawm si zet zawng khaw dang han hawisan a har teh zawng a ni e. Chumi hun chhung reilote avang chuan he nun hi a danglam zo a, a la tawn ngai leh hriat ngai loh ram ah chuan hnuh luhin a awmzui a, a kum khaw tanin turah chuan a hun a hmang tan ta nghal a.

Mihring kan lo pian hian engmah kan lo chhuahpui lo a, kan nun'in a tawn hriat atang vek a thil zir kan nih avangin kan upat zawh pawh leh kan nun a hlim zual a, a lungngai nasa sauh a, mittui a luang tam telh2 bawk thin. Chu a zirna atang bawk chuan a ni, a ni chumi hun chhung reilote avang chuan a thinlung thianghlim chu kaih theh a ni ta. A awmzia a hrethiam lo - a na ti dawn sela a hlim bawk si, a hlim tih dawn lahin a nuihpui thei bawk si lo. Hmangaihna hi zawn a zawn chi a ni lo e, a hunah chuan in hrilh hriat chawp a ngai lo a inthlunzawm nghal mai a ni an tih dik zia chu a nunah chuan a lang chhuak chiang hle. A awmzia a hrilhfiah chawp a ngai lo. Romeo leh Juliet-i te nun in pumpek lai kha tawmpui phet tumin a in hrosak a ngai hek lo. Mahse a beisei ang leh a rin ang reng reng chu a ni si lo. Hriat loh leh tu a nih ngai pawh a ngaihtuah ngai loh lakah chuan a thinlung chu hlan a ni, chu mitmeng chuan a hliam a, a tuam damna dang a awm mawlh lo. Cupid thla zap ri pawh hre hialin a in hria a ni. Chu thal fang no tak leh zai sin tak mai chu laipui kah ai pawhin a tuar tu tan chuan nat chang a awm chawk. A then tan hlimna famkim he khawvelin a pek theih lawmna sang ber tawnna a ni awl thung lo. Mahse a ni tan erawh zawng a bul tan dan hrilhfiah a har ang bawkin a tawk bawk dan tur hmuh thiam rual a ni lo. A tan lawm avanga mittui far tir tu tur nge tahna avanga luan tir zawk dawn tih lah hriat lawk tum chi pawh a ni si lo.

A chang hi chuan hmalam hun hriat lawk theih loh hian nun hi a ti hlimin mihring hi min lo khalh phur em2 mai thin a lo ni a. Kan han dawn vang2 a - a kil tin kil tang kan tlawh chhuak vek a - a tha lo thei anga tih pawh hrereng chung khan kan rilruin a buk rih zawk lam kha chu kan pan leh nge2 thin. A ni tan pawh chuan chu chu thudik famkim a la ni reng mai. Vawikhat melh avang chuan suangtuahna sang tam tak a din chhuak a, a remkhawm a, a tha lo lai a paih thla a, a din thar leh a - mahse a tawpah a bang chu chu 'nula' lem chauh chu a ni zel mai si. Bul tan dan a hrelo, a kawng pawh a hmuthiam hek lo. Thimin a hual vel a eng te tak te lo phe zeuh chu changin a thuran a, mahse a awm si lo. Leihlawn awmlo chu a zawng a mi aw !! te pawh chu a ti rum2 thin. Mahse tlawm chi a ni lo a tlawm a tum hek lo - hmangaihna khurah a lut tawh a tan kawngkhar chunga 'puanzar var' thiah kha a theih mawlh tawh lo.

Hringnun hi chu lungchhia leh hlimna kar a tla zep a ni reng a, duhthlanna tur rilru thiang min pe tu hian kan duh thlan a phal reng bawk a, chumi hmang thiam leh inthiarfihlim thiam chuan nun hlawhtling leh hlimna chu an hmu mai a, a bak zawng chuan lungaihna chhum rit phurh chu kan chan tawk a ni.

Hun in a hril ang chu hunin !! aw 'hun' i thlazar hnuia a hringun rem ho thin tan hi chuan i awmzia hi hriatthiam a va har thin em . Naktuk hian eng nge min thlen dawn - ni eng mawi tak chu nge min chhuah dawn ruahpui vanawn tih lah chu a 'hun' ah chauh lo chuan a hriat thiah si loh. Mahse hei zet zawng ka chiang - he hmangaihna thinlung ru bo tu 'nula' zet hi zawng kawlkil tawp thleng pawh ni se - kawlvalenchham pawh thlawh kai ngai mahse a hniak hnung chu chhuiin a la zawng chhuak tho tho dawn a ni. A tan ruah leh ni hi a danglam lo a, hling leh hriam pawh hian a dang zo hek lo. Damna zawng tan nunna tui chu a hnuchhawn theih dawn em ni ang !!!