chhungril khawvel

Kum tam a liam leh meuh chuan hunpui massi pawh pathian hruaina zarah hei ka ban phak chu ani ve leh ta reng mai a. Thlasik ni eng mawi in zam vel kara lalpiang lawmna hla han ri leh chuai2 thin te pawh hian dam hlut zia a egti zawng maw tal chuan mitin tan a puang ngeiin a rinawm. Keini reiek tlanga ni tla hmuphak a awm tan meuh phei chuan kawlkil rawng in kap ki eng chu a hmuhnawm lehzualin, mit a tlai zualin pathian thil siam hi a nih tur angin a in puang chhuak chiang lehzual hian a hriat thin.

Kristmas bazar chakkhai la khawm a han chhuah vah changa tawt tak maia mi in sul pel zung2 mai leh kohhran tin maiin biakin leh a vel an cheimawi thar leh sup2 takah chuan hunpui inthlak pawh chu inhrilh chawp ngai loin rilru ah a chiang thar em2 a..Kawngkai dar nghak tam takin 'sale sale sale' an tih lauh2 te chu rimawi a nihna chen te pawh a awm ve fo mai.

Hmel leh pianphung,nunphung,serh leh sang in anglo tak2 mai min hnup khawm a hlim hmel in hmuh chunga kan han in nek khawm talh2 te pawh chuan chu hunpui ropui na chu a hril kan ti lo thei lo ang. Hmangngaihna zam vel thlasik thli vin tak maiin a a len darh chem2 dawng fuh tu tan te phei chuan a hlu lehzual em2 ta ve ang. Hmangaihna vanga he hun hmang thei hi kan nih avang ngeiin a hmangaihna chang fuh tu tan chuan a kalhkimna ti ila kan ti sual ltk lem lo thei ang chu.

Engpawh chu lo ni ta se, he hun hi hlimpui tum threuh ila kumkhat a kan nghah chhung a rei thin zia te rilru a hre reng chungin kan hlimna hian lungngaihna min thlen lul lo teh se...'kan vannei em e lawmna ni kan thleng leh ta...' tiin lam i thai teh ang u.... 'give love on christmas day'...

Kristmas chibai vek ule...

Hmanni kan veng KTP sports chu Kelsih tlangdung lamah kan va nghat teh daih a, saw lam thlen phei lohna a rei deuh tawh bawk nen rinai takin a ram hmel hmang chu mitah a thar angreng phian a. A ram thleng a nuamin a zawl thra bawk a,a chuan pawh a nuam hle mai. Infiamna lam tih thiam em2 nei ve ta lo chu thla te kan la kual vel mai2 a hei tlem chu post ti tam tu atan kan han vawm bei ve leh mai2 a nge...

Sikni eng'in kawl vel a phuh en leh sen2 tawh meuh hi chuan rilru ngui te pawh hi a lo harh thar leh vawng2 mai hian a hriat a, lunglenna ruam thim mup mai te pawh nunhlui leh hmabak ngaih leh nghahhlelhna avangin a eng de ve le truam2 mai a nih ber hi maw..
Kohhran beihrual kan hman zawh tawha chin ngat ah phei chuan camping mahni veng theuh ten an buaitsaih a nih em2 lem bawk si loh chuan rilru lamin bethlehem a hawi vu e ti lo chuan a phawvawk boruak chiahpiah lah hi na ve zek thei mai a. Duh leh it, mamawh leh ih vel zawng bak ngaihtuah teh vak hi a awm em2 lem hlei law. Rilru a thil a kal lakloh lah hian a han tawp em2 mai thin bawk a entir nan tun ang te hi..huizz... kan ro dang char zo vek a nih ber hi maw..
Thahleinga te kan lawm hma'in update ve leh hram2 ka tum te tih teh tralh karah ka han in nawr tawm lui ngial dawn a, thiamna a tlemsa bawk nen intur tak ngail a far thei pawh a awm lo a nih ber hi maw...mahse engmah lo aiia 'dot' pakhat pawhin pawimohna a neih theih tho chuan tiin kan tyoe kual kawi ve mai2 a...huihamz awmzia lem hran a neih chu ka hre chuang hlei law..
Tlaini tlaiin reiek tlang chuang a par chhuang a a in kap eng sen eng deuh ruih mai mithhla ral2 chungin-engber nge maw min mawlh le tih kan ngaihtuah chhunzawm leh mai2 nge...

Ka tukkhat zing tho chu eng hian nge maw min mawlh tehreng ni perh thiam uk si lo hian perhkhuang chu ka han kuah ve chawt ringot a, chiang mang hlei lo hian rilru a awm hmasa ber fam Lalzoa ro hlu ‘mangtha mangtha ‘ tih chu ka han thluk veng2 mai a. Hringmi nun piah ram lam ah chuan mute thla hawhin ka leng ta veng veng mai.

Kum tam a liam ta , tlai a ni a, ni pawh kawlkilah a in hnuk liam ve mek bawk a. Mitin mai chuan khuain a thim hnan ang tih hlauin an hna tul chu an ti sap sap hlawm a. Thing seng khawm mawlh mawlh te, ar lawi a in um kawi zuar2 te , losul haw lam kawtchhuaha lo kawi nguah2 mai te , naupang rual nu leh pa te feh hawng an thil hawn changa lo dak iak2 mai te chu hmuh leh hriat hmaih chi rual a ni lo. Ralkhat bawng bu ul2 mai leh a kai tu ri rawk2 te chu mipangngai tan chuan hun inthlak mek hril tu a ni reng a.

Mahse chutiang buai leh ri nuaih2 karah chuan Lalzoa chuan engmah tih zai reng a rel thei si lo, mahni a awm ang main che miah loin kawlkil ni liam tur eng tawk2 chu a thlir veng2 mai a. A ‘tun hun’ nun chuan thu a sawi hlawl lo, biak tur a awm lo a- biak theih lah a ni hek lo. A nun a ro hlu ber mai leh a hmangaihna hmasa a lo hlanna chuan hnawlin changdang a kan san ta si a. Ni, a bul vel nun chuan atan awmzia a nei reng nang, a nun a hloh tawh a , mi ang pangngai a nihna chuan chumi ni la la chuan pialral a kaisan ta si a le. Hmangaihna hrui hrual suih natzia chu atakin a tawng tan a, a kual khung tawh tan lah in phelh dul leh a harsat zia chu a hre tan dawn chauh a ni.

‘Aw kan nunhlui hmanlai thlirin

Suihlunglen kimten a tho

lungkham chhailai di zun chham lo

saisena chhun chawiin’

Chulai tlangah chuan tudang ngai loin tlai khua an lo var za thin kha a ni a, thlasik thliin phul a chem kur dial2 karah chuan an taksa vawt tur chu an lo inkhawr lum sak tak thin kha a ni a. Chungleng sava te nen zai vawr hoin, an tan chuan an khua a an nitin nun chu hlimna hlir mai niin, zing ni chhuak chu nghakhlel takin an thawhpui a, zantai rek chu khamlo takin an thlah liam nitin thin kha a ni reng a. Chu khua bak an tan hmundang thlakhlelh tur chuang a awmlo - vanram tlafual an sawi fo thin hi sawifiah tum ila hmundang pan a ngai lo an pahnih nun chu kawtin 'saw saw a ni mai lei pialral, damlai vanram chu' ti ila tuman hnialkhan an nei thei lo ang. Ramtuk thla te chu Lalzoa tan chuan hah thla a ni ve lemlo a, nilengin ram tuanin hna hram thawk mahse zan a ni anga a 'zanlalnu' a 'varparh arsi' eng hnuaiah chuan a hun a hmangral leh dawn tih hriatna chuan a hreawm zawng2 pawh chu a chilh bosak fo thin. Feh in lawm hun te mawlh mai chu a ni an nghahhlelh a, an in hmakhua nasat thin ni. Nilengin hun an nei dun anga, zanah an inrim chhunzawm leh zat bawk anga, nia an tan chuan chu tluk chu a awm reng nang - an duh leh sam ber chu awm dun nilen kha ni miau hek. Khuangchawi thla lo thlengin an khaw pum an chai te, khuangchawi an awm ni khuaa, an chheih zan tak te hian nuam an ti fal thin. Favang awllen thlahlei ngazan te hian an nunah awmzia a nei thuk bik emaw tih tur hian an lawm zual bik thin a, an nun pangpar chu a vullai rei bik emaw tih turin rimtui a chhuah rei bik thin hle a ni.

‘kumsul lam ang her se

sakhmel tha sen siar kan tawn

thinlai ah di zu n a lo chham a

lunglen kan kiu vawng2’

Mahse hringnun hi zawng vul reng tur leh par reng tur a duan ni hek lo le. Rin loh leh beisei loh atangin kohna dang an dawng ta tlat mai si a, chu pangpar huan ah chuan rose par sen pahnih chauh a par reng thei bik si lo a, a dang lo tiak veiin a par var chi te an lo kuh mum ve tan ta reng mai a. Aw theih niseng Lalzoa chuan huanpu chu pangpar dang lo tiak tur chu lo hloh fai tir zel mai tur. 'hmana ka rosepar phun kha ka chawm thin zingtuifimin ...' aw he hla te hi lo piang hman seng chuan a hla duh berah a chang mai awm si a- '... a par vul lai tak khan e chhingkual valin min thliahsak ka tuar thiam lo' .Nia tawrh thiam hi a har hle reng zawng a ni e.Ni, Lalzoa tan chuan khawhar lungleng a kiu vawng2 mai loh chu tih theih a awm ta si lo. Hringnun zet hi zawngin mihring hi a sawisa retheiin a va vaw na thei ngai em !!

Kum tam a liam hnu meuh pawn a tan chuan han hlimna tur chhan he lei hian a rah chhuah sak meuh lo. A lunglen thu hril bak chu a ni tan chuan sawi tur a awm lo, a ni han sel em2 tur pawh a awm chhuang lem lo. Mahse nun pangngai chu a tan beisei theih a ni tawh lo. Kumsul eng emaw zah pawh vei mahse a nunkhawdang a hrin chhuahsak chuang lo a. A tawp a 'lunglen kan kiu vawng2' tih mutpui bak chu a her chhuahpui mawlh si lo. A tan hmangaihna hruihrual chu a lian bik a, a hrui a thui zual bik a, a hlin a chhip zual mawlh bik a ni. Hmangaihna chu hmangaihna vek lo chhuan chhan letna dang a awm lo, kawngtum lak tur a awmlo a, pehhel lah a awm hek lo. Hling leh hriam chu zuan khum theih a ni lo tawn tlang a ngai tlat a ni. A chang chuan hriatreng theihna tura khuanuin kan rilru a lo duan te hi a thinrim phah urh thin. A hma te kha chuan, engnge maw vang a vangkhua pelh ngaih chang awm thin te khan an lunglen viau thin mahse thinlai a di zun chham avangin hlimin hun leh nite kha an chhiar theih phah thin kha a nia, mahse tunah zawng chu ‘zun chham’ chu rilru tina thar tu leh trah khua ti sei mai tu an ni ta si a leh.

‘chhakkawl rawn turni lo eng se

tawn loh nan tuannna a dang

awmkhaw har di ngai ka tham vel a

tuan zai ka rel thei lo'.

Hringmi ramah la awm tlat hek harsa ti em em thinin zan mut zai te han rel ve bawk thin mahse a tan chuan kawlkil vartian lo in phan chhuak te chu lungti leng zualtu a ni zel mai si .Muttui theih a ni lo, muttui zia reng a ni mawlh lo ve. Kan dem lul dawn em ni ang, hmangaihna hmasa chu kan nuihzat thei dawn em ni?...Hmai a han phih a, rap chung ar te pawh thawh khalh vekin kawl a ni zam in phan eng tan diar2 chu thlir ngawih2 in, biangah mittui thianghlim chu a far keuh2 a, a ni a nileng hun hman dan tur a thlir thiam lawk vek bawk si.Beiseina tur a nei lo a beisei bo chauh mai chu a beisei chhun a ni miau mai si a leh. Hun dang nidang ang te zawng niseng tukthuan pawh bar tha hman hleithei loin a phur thin leh tur kha a nia leh. A tan chuan hun awm hi a hmelma lian ber nihna chan chang te pawh a awl lo ta mai. Khuanu remruat te hi pawmthiam chi mawlh a ni lo...kumtluan daih lo tur hmangaihna lipui a luh tir tu hian dem a phu in ti ve mawlh lo maw !!!.

'tlai khaw a lo ngui a

hellai di run kan kai a

zankhua tlai se samang thennan e

mangtha mi lo ti e'

Nya a har reng a ni. Maltlat nun hreawm zia a hrechiang tu apiangin an sawi tawp thei lo a. Tlangval ta fam mahni run lumah a lungpui hun ngawt theih reng bik si loh a, nula rim a thiante bar rual a ban te lo ngai ve thin chang a awm lo thei lo a. Chutia phei a han khai ve chang pawh chuan a mawng a nghet thei meuh lo. Taksa chuan inchhung mawi mahse rilru erawh chuan khawdang a thlir lo thei lo. Mahniin kilkhatah thiante nula chhaih vel chu a lo en tlawk2 a, chutiang a hlim tak a a fiam ve thin lai te chauh lo chuan a ngaihtuahna a fan thei meuh lo. Lenghnawt ar te khuang hma a tih thin nen tunah zet zawng a nghahhlelh ber a nit a fo mai. Aw khawvel hi chu a lo va bungbu nasa thei thin em.

‘aw le mangtha en chhim loh di

vankhua a zau kar a hla

tawnmangah tawh leh ni her sela

thutin i hril dun ang.’

A ni atan chuan engnge sawi leh chuan tur awm taw hang. Hmangaihna beidawngin a velh tawh tan mitttui hulna tur reng a mawi tur he khawvel hian a la hmuchhuah mauh si lo a leh.Duhthusam ram a chen a, duhthusam a in hnem hnan mail loh chu !!!... dem thei kan ni lo,, aw kan dem mawlh lo che. Lunglen vanga fam Lianchhiari meuh pawh hian ‘aw ka unau’ a tih vawng2 che a ni kan rin ni. An tan khaw eng a tawi lua a ni e. He khawvel lo zau lutuk te hi kan hmuh mawh mai dawn a mi. Nia, tawngmangah tal chuan hmangaih kal ta te kha hmuh leh a mawi thin. A tak ram chu ‘tawn loh sa bawp’ chang tawh mahse kan rauthla tal a han fan leh a chakawm thin. “Zanin ka tawnmang chu e’ tia duat taka a hmuhthu a hrilh lai te kha a mitthla ah chuan a cham reng a, mahse tunah chuan han sawi chhuahna tur beng kawl an awm tawh si lo. Hlim taka a hrilh zawh a, nui ri her2 in ‘ tak2 maw’ a tih te kha boruakah a thamral zo ta. Tunah chuan a tak beisei chu sawi loh a lum , tawnmang lamah tal pawh tawn leh ni her chhuak thei se tiin hmalam a thlir ta vawn2 zawk si a maw…

‘aw chhawrthla eng hnuaiah

mahten duhthu ka sam a
luahloh tur di mahnila parte

ngaihlai ka bang lawng che’

A vawrtawp kan thleng ta. Beisei bo beisei thin hringnun hian harh chhuah reng a phal lo a ni. Lalzoa meuh pawn hei hi a nunah a hmu chiang khawp mai. Chutia tlainin tla a thlir zuih rial2 lai te chuan eng thu dang mah a ngaihtuah thei lo. Atan chuan chu chungturni thlak tur a chhawrthlapui lo eng tur chu tawrh a har leh dawn tih zawng mai loh chu. A ni, chumi eng hnuai-ah ngei chuan a ni kum kha chen duhthu a lo sam a, ngaihtuahna ram lama a lo chen fo thin ni. Koh kir theih tawh loh koh kir tum a a lo kir nasat thin zia te chu han dawn kir thin mahse a beiseina chu a ti thlawn duh bik chuang lo. Mahse hmangaihna dik ziarang chu a ropui zia he kan Lalzoa nunah hian chiang takin a lo par chhuak a, a par mawi chu keini a hla lo ngaithla thin te tan hian chaw duhawmah a lo chang ta thin a ni. Luahloh tur a ni tih a hriat reng tawh mahse a hmangaihna dai lo tur chu hrereng chungin duhsakna leh hlimna a hlan a bang chuang lo. Awle mangtha mai le, I duhthu ang ngei chuan he lei hi chen la, I hlimna chu umin he lei dam chhung tawi te hi hmang ang che. I kalsan tak rilru ruak hi chu lo hrevereng thin lo mahla , mahte a runhmun I nghah changing leh nitin nun buaina laka I hahchawlh chang apianga I nunhlui te I ngaihtuah chhuah ve chang tal chuan I hnuchhawn ram hi chu I lo hrereng ve thin dawn nia. A ni I tan ka nung thin a, I tan hian leipiah lam ram chu ka la pan ve ngei dawn a ni tih tal hi chu I min lo hriatsak ve thin dawn nia.

Duhtak ‘mangtha mangtha’.