chhungril khawvel

Kum tam tak chu la liam lemlo mahse kan rilru te a la thatlai zek zawk leh taksa ten min la zawh viau lai hun a 'khat hnih thum-vei ding' kan tih ve thup2 lai thin te pawh thlir kir a awl phian. College kal tan tir te kha kan la ni bawk a, a nuam ve thei thin hle mai. Kan veng velah hnam lam zir tur tih an han puang lauh2 a, kan hawklak tei chhuak ve kha tum leh beisei aia rein kan in 'di' chu a ni ta reng a. Chutah tlemin kan kal thui hret a, Art and Culture dept. lamah te thleng2 khan thla thum teh meuh mai kha lam thai zirin kan chhuak nitin ta mai kha a nia(h). Ngaihtuah let leh rauh2 hian a mak te tih dawn thut2 chang a tam mai, mahse a lo mak lo e tuina a ni miau a, a vawrtawp thlen pui law2 mai te kha a lo ngaihchang a awm chawk a ni.

Mizoram hmun hran2 te kan han hrut ve a, beisei loh lam2 pana bus bang beng ri thap2 pah a zai that2 chang te a kak nuk bawk a. Ngopa zin mahni chauh a in khat diat2 kan han thleng mai te kha, puitlin zirna tana khan poimawh tak a nih rualin a hunlai kha chuan chawbar tam a har ve thin kher mai. Thiam ber tih tur khop te ni bik lemlo mah ila, a hminga 'certificate holder' nih ve takah kha chuan 'official-ambassador' tur thlan a ngaih chang khan kan tel ve leh nawlh2 thin a. In rin hma hmain Delhi tlang lamah ah te kha rellu khu vut2 poh kalin kan dak ve leh vung thin. Goa kan kal tum tluka aw!! rel a chuan a rei ka tih tum kha tun hnu thleng hian ka neih leh pawh ka inring lo e. Guwahati atangin direct train-in Bombay ( la ti hrih mai ang khang lai kha chuan a la Mumbai chiah bawk si lo a) kan kal, huiz a rei ltk. In ti hlim tham khawp a tam kan ni chung khan mawng a vung lo chauh a ni e. Bus in Goa an pan kawng a lo tlangram ve deuh leh a khamko kual ve angreng lai te kha a lo awm ang fer fur a, Azl lam ngaiin kan kur ve nguai2 hlawm tak a.Tumah dang awmlo a han in chul nel na na na hi chuan a tir a in lunglen lemlo te pawh in par chhuah duh viau e an tih fiam thin hi a tak a lo ni ngei a niang chu, thlakhat vel kan han tal ho nak2 tawh hi chuan thiante tute emaw hi chuan in then har tiin an in pawm vawng2 haw fo mai. Tiang vang te pawh hi a ni angnge MBBS lam zir a kum nga lai tei hawi ho te pawh hian an zirlai pui an neih tlangpui ni ( disclaimer- ngaihdan zeh telna mai a ni, thutak lak a khuk pui ruai a rem lo i ti mai teh ang u). Tia Rahman an India ram a ti ropui ti a a Oscar kan lawmpui em2 lai hian hman...an an deuh tawh a Delhi mual a President address a show kan neih tuma ' Vande Mataram' tia min awih dual2 lai te kha mitthla hian a thlir kir doh2 mai. 

Hnam hrang2, nundan ze dang nuaih, ei leh in lah chu kan bel khaikhup tawk ang mai a in lehlen thah mai kan han thleng khawm a, engmah dangin min phuar khawm lemlo. Kan hnamlam leh hnam nunphung theuh dang nuaih si khan min lo man khawm reng mai kha a lo ni a. Mizo'in kan mau kan han khawngri thup2 a, Naga unaute fei nen an lo zuang ang tawrh2 bawk, Assamese hoin an lam mawi 'bihu' an lo dir pui diar2 a, Karnataka lam te khuang an tlir ang zawt2 a, Coconut kawr kut a kheh mai lo a vawr a lo tauh keh chuai2 lah bang lo. Chumi dawh a chemsei vai lo entir a lo in khak ri ang tlawng2 lah hriat tur a awm zut. Thian tha ve angreng tak2 te khan kan lo siam ve neuh2 a, haw hun tahrik a lo her chhuah meuh kha chuan 'eng eng emaw' te kha 'min hriat reng nan' tiin kan in pe awllo mai thin. Lung an va len si thin tak em !! Ka ral thiannu tak te kha- kumsang pawh damin tu za chuang pawh an mawng beng mah ila in hmuh leh tih reng a awm tawh lo anga, han inhmuh leh ni a zeng pawh khuanu thil tihtheihna hnuaiah hian her chhuak mahse kan sak leh hmel hi kan in hre chhuak tawh kher awm si lo a, kan in midang chei mai2 tawh awm si a le(h). Siamtuin a hun te a rah tur leh  tla  tura a duan lawksak ang mai hian kan rah lai bak hi chuan kan ngaih leh lunglen te pawh hian hlutna an nei tam lemlo a ni e. Kan kawngpeng thuam zawh theuh te hi kan kal thui tawh hlawm em a, kha in tawhkhawmna lamlian khan a eng min mih san ta a ni ber e. Dam tein malsawmna leh duhsakna zurin leilung hi mawi mawlh te u, min duangtu kut khawih nghakin a ramah chuan kan hun leh ni liam ta te kha kan la in hrilh tawn thin dawn a nia.

Ka tum loh lam daihah ka peng thui ta viau mai. Thiannu pakhat chuan tun lawk kha min lo sms a ' hei an lam khu rum2 mai, kan vanglai te pawh a ngaihawm hle mai'. Nia a ngaihawm thin reng  a ni 'vanglai' hi. Lammualah lam kan han thai tak2 kha chu ni sa vel vawl tak te khan a nuam kan tihna kha a hliah khuh zo meuh lo. Ruak deuh thawin kan han 'haw haw' tuar2 a, vengtin atangin ka thiam ve tawk ti thiau khan kha mual kha kan khah thin kha a nia, chutah entu mipui lo tlim hmur mai nen - nia a nuam a ni. Mahse vanglai hun  an ni tawh tlat mai. Khuangchawipa leh 'nu' an lo zawn chhuak a,a  hnungah khuallam a lo in zar pharh darh2 a, boruak hulum a sang tial2, chutah leh thil an han vawr ta tak2 mai a, kan tlan phe lawk2 mai a. Tumkhat kan thianpain 'ar' a man fuh hlauh mai a, a zan chu a nuam thei ngei mai. Tumkhat leh pawh khua tlemin a hnawng deuh a, chhum lei vakin mual vel a bawm ang chiah chuai a, thli hmuhfiah vak a har fu a, program te a zo tawh bawk nen mipui an haw fai ta maw tihah mual sir vel cheinan a 'flag' an tar kan han tak2 mai a, thil 'ru' chu kan nih rualin chutiang zawng chuan zu han in ngai hlawm miah lo a. A hnuah kekawrbulah kan thui a, kan la chhuang phian zawmah a.Mak thei ngei mai 'vanglai nun' kha. Cheraw mawlh mai kha mipui nghahhlelh a ni thin a, nia a chung atanga en kha chuan lammual khat pap mai a cheraw kan kha chu mawi ve tak a ni, a khat a kumkhatah voikhat awrh tiang ang a lam kha awm thin a ni bawk nen mit a tlai ve fu thin ang. Tunhnai deuh a ka thlalak hmuh thar pakhat chu 'Khuallam' lai a ni a, a hmuhnawm ngei mai. Lammual sir kual kha an khah vek a, a mual zui khan an han an puan bah an han zar chhuak thap2 mai a, thil hmuhnawm chu a tling ve a ni.

Chuan le !! tunah pawh Aizawlah chuan ( a lawmna pui ber a nih vangin a hming hmerh mai a ni) an lam an thai leh mup2 tawh a nga. Lammual pawh a khu leh rum2 tawh ang. Taksa hi chuan a hlat vang2 viau nangin, rilru chuan phei a khai ve mawlh2 reng a. 'Tum boh boh tum boh2 ' ti thet2 pawh tunah hian ka bengah a chamreng mai. Aw le kha raw - sarlam thai ang aw tiin aw fiak tha deuh an ri lau2 a, thianpa Ate-a te hoin in la senior takin khuang an chuh leh sung2 tawh emaw a ni ngei ang le, chuang khuang an beng ri tan - ' in peih ru' khai le - khat hnih thum vei ding aw aw, chem vai kha uluk deuh rawh' khawnge vaivuk hi i han pal khu lui teh ang, kan paw ta sa sa...' E khilai kila in thlak sawk2 khi Heleni kha a nih khi , Tlangnuam ho a lo hruia a ni maw' .. 'hei hei Ma- He, dam a maw, i va han vang em2 ve'. Kil khat ri nuaih2 atang chuan aw hriat thang tak mai a lo ri chhuak a - ' rb, teh mial che chuan khawnge i awm bo vang2 a, i lo la lam ve reng a ni maw... i zin leh tawh em?', ka han hawi a Saikhamakawn lam thianpa lo ni reng chuan - 'zin hman pawn ka awmlo, hmundangah ka awm a tunah pawh ka lo haw remchang em a, ka tel ve chang ngang a niang hei ka lo in thiat ve tawp a nih hi practice pawh practise lem loin'... Ka han hawi kual a, hmel hriat ngai loh tleirawl, rawlthar chhuak erh-awrh chauh tih hriat ngoih2 karah chuan thianhlui te hmel a lo eng ve leh pheuh2 a, kan lo 'u' ve ta deuh a ni ngei ang chu, mahni awmna theuh ah chuan rawn leh a kawkkual tu an ni ta deuh vek mai. Lam han thai rual kan ni ve ta meuh lo e, khuang bu leh dar bu chai peih tawk2 chauh mai kan ni ta. Hun hian min lo hmer na ve sawt hle a ni, kan tawngchham ta deuh hu vek mai.

Ni a her bawih tawh mai, mipui pawh an tin ta pheuh2 a, kan kut neih chhun leh hlu ber pawh chu a zo a ni ta deuh reng mai. A hawklak zual lem mualah chuan an la su lauh2 a, mahse chung zawng beng khawn an ni ta lo. Nghahhlelhber a huho 'CHAI PUI'  a zawh meuh hi chuan kan kam duak thin reng a ni. Khawnge nula no nalh deuh i han 'chai' pui teh ang tih rilru rengin a hma atangin vengtin kha mitin a lo thlir kual ru ran a, chutah 'saw zet chu a kethiah a no nalh ngei mai' tiin a rukin kan hnaih tial2 a, K.C Runremsangi ten 'German ral run' tih leh eng eng emaw han han thuro zualko pui hlawr2 meuh chuan an bulah kan lo tawlh lut der tawh mai thin a, lam thaiin kan lo in kuah leh chial hlawm reng mai thin.

Ti chuan, hunbik nei a  nihna lang thar lehin chu hun hlu leh ropui tak mai chu kawlkilah a pil leh mek a. Nakumah kan ti ho leh tak2 dawn nia - khuangchawi vawrh hunah chuan chan khan ka hre tawh... tih a in hrilh diat2 hlawmin kan in chibai sang2 a, mahni runlum lam bel turin kan phei chu a in khai phei ta tham2 hlawm a ni.

'Chapchar Kut' hman nuam leh chibai vek ule .